من فاااااات قديمه .. تااااااااااه

من فاااات قديمه تااااه
كان فيه زمان في بلدنا و جنب بيتنا بيت صغير اسمه كتاب
كنا بنحفظ فيه القران

كنا لسه صغيرين
كان سيدنا الشيخ بيقول و احنا نقول وراه كلام الله
و كنا بنعرف عن اهل الكهف و سيدنا موسي و السحرة و فرعون
و قصة سيدنا يوسف و السبع بقرات

كنا لسنا صغيرين
و كنا بنعرف سيدنا محمد عليه الصلاة و السلام خاتم المرسلين
و قصة ادم و حواء و الشجرة و ابليس اللعين
...............
و كبرنا و كبرت احلامنا معانا
و عرفنا الشرق و الغرب
و قرينا عن الروس الملحدين و الامريكان الحلوين
و عشان نطلع القمر زيهم
لازم نطور التعليم

نبني بدل الكتاب روضة للاطفال
و نحط فيها مراجيح و زحليقة و العاب كتير
و نعلم الاطفال تفاحة يعني آبل و القطة يعني كات

و دخل اولادي رياض الاطفال كي جي ون و كي جي تو
و اتعلموا تفاحة يعني آآبل و القطة يعني كات
و النتيجة و بعد سنين في التعليم
دخلت بيتنا اقول لاولادي السلام عليكم
ردوا عليا كلهم
هااااااي داااااااادي

ده كله يا باشمهندس سببه ايه
ليه بعدنا عن لغتنا العربيه ليه
جرينا ورا ثقافات غربية جري ايه
جري أعمى تقليد وبس من غير تفكير
سبنا لغة القرآن وجرينا ورا أساطير
سبنا سبب قوتنا وضعفنا كتير
فاكر زمان لما كان المسلم انسان
يحافظ على لغته ودينه على مر الزمان
حكم المسلمين العالم حكم أشد من الامريكان
حكم قوه . حكم رحمة ...... حكم القرآن
ياريت ترجع تاني هويتنا العربية
ياريت نتمسك بيها وبلاش كلمات غربيه
لا معنى ليها تقليد أعمى ونقول حرية
حرية ايه يا عم ( سامي ) واحنا كنا أغلبية
دلوقتي كتير مالناش كيان وهو ده سبب الهوان
مالناش رأي غير في التفاهات
بعنا نفسنا علشان حاجات
لا ليها معنى ولا ليها دين وكفايه نقول حريات
شعارات كدابة وكلام من غير افعال
نسينا كلام رسولنا وهو اللي قال
كتاب الله وسنتي دول هما الآمال